1. Бокаши сав хэр хурдан дүүрэх вэ? ⏱
   Хэрэглээнээс хамаарна. Өрхийн гаргаж байгаа хүнсний үлдэгдэл, тэр дундаа бокашинд хийх боломжтой ургамал ногоо жимсний үлдэгдэл хэр их байхаас хамаарч 7-20 хоногт дүүрч болно. Айл болгоны хүнсний хэрэглээ, ам бүлийн тоо, саваа ашиглах идэвхээс хамаарч өөр байдаг.
   2. Бокашиг гэрт тавихад үнэр гарах уу? Битүүмжлэл хэр вэ? 👃
   Бокаши сав нь 2 давхар тагтай, цорго нь нээж хаах хавхлагатай бүрэн битүүмжлэлтэй сав байдаг. Хаалттай байхад үнэр огт гарахгүй. Нээх үед үнэр гарах ба хэр удаан исч байгаагаас хамаарч үнэр нь сул, хүчтэй байна. Иймд бокашигаа нээж хүнсний үлдэгдэл нэмэхдээ орон сууцанд бол цонх, балконоо түр нээх, байшинд бол үүдэндээ түр гаргах зэргээр агааржуулалт сайтай орчинд хийхийг зөвлөж байна.
   3. Бокаши дүүрээд 14 хоног хүлээх хооронд хоолны үлдэгдлээ яах вэ? 🥕
   Бокаши савыг хосоор нь хэрэглэхийг зөвлөдөг. Нэг саваа дүүргээд 14 хоног исгэх хооронд нөгөө саваа ашиглана. Зөвхөн нэг сав ашиглаж байгаа бол хүлээх хугацаандаа хүнсний үлдэгдлээ ердийнхөөр хаяна эсвэл цуглуулаад хадгалж болно, үүнийг ХЭРЭГЛЭГЧ ӨӨРӨӨ ШИЙДНЭ. 
   10л сав нь орон сууцанд эсвэл бордоог бага багаар гаргаж авах айлд хялбар байдаг бол 21л том бокаши нь өрхийн хэрэгцээний жижиг талбайд ногоо тарьдаг, хүлэмжтэй, цэцэг ургамал байнга тарьдаг, мөн бокаши савыг тогтмол хэрэглэж сурсан хүмүүст илүү тохиромжтой байдаг. Бокаши 10л савыг 2-3 ээлжилж хэрэглэхэд зохимжтой байдаг бол 21л сав 2 байхад хангалттай. Мөн 10л, 21л савыг ч ээлжилж хэрэглэж болно.
   4. Бокашигаас гарсан үлдэгдлийг яах вэ? ♻️
   Иссэн үлэгдлээ хөрс шороотой хольж бордоо болгоно. Орон сууцны айлууд гэртээ цэцгийн хөрсөнд хэрэглэж болно, гадаа модны нүхэнд булж болно. Хашаа зусланд газарт шууд булж болно. Бордоо хэрэгтэй хүнд өгч болно. ХЭРХЭН ХЭРЭГЛЭХЭЭ ХЭРЭГЛЭГЧ ӨӨРӨӨ УРЬДЧИЛЖ БОДОЖ, ТӨЛӨВЛӨСӨН БАЙХ ХЭРЭГТЭЙ. Манай нийтлэлээс зарим аргуудыг сурч аваарай.
   5. Бокаши бран буюу зориулалтын үртсийг хэр удаан хэрэглэх вэ? ⌛️
   Хэрэглээнээс хамаарна. Бокаши саваа идэвхтэй хэрэглэдэг айлд 500гр браныг 3-5 удаад нэг сав дүүргэхэд хэрэглэж дуусна. Хүн болгоны баримжаа өөр, хэрэглээ нь харилцан адилгүй байх тул үүнийг зөвхөн хэрэглэж үзээд өөрийн гэсэн баримжаатай болно.
   6. Бокашинаас гарсан шингэн бордоог яах вэ? 🫗
   Савны ёроолд байх цоргыг 2-3 хоног тутамд нээж шингэнийг юүлж авна. Уг шингэн бордоог 1:100 харьцаагаар усаар шингэлээд шууд цэцэг, зүлгээ усалж болно. Маш өндөр концентрацитай иссэн бордоо гарч байгаа тул ургамалд хэрэглэхдээ заавал шингэлж хэрэглэхийг анхаараарай. Хэрэглэхгүй бол угаалтуур, жорлон руу асгаж болно. Бохирын системд сөрөг нөлөө байхгүй органик шингэн болно.
   7. Бокашинаас шингэн бараг гарахгүй байна? 💦
   Заавал шингэн ихээр гарах албагүй. Хийсэн үлдэгдлийн шинж чанараас хамаарч шингэн их, бага янз бүр гарна. Аль болох шингэн ихтэй зүйл хийхгүй байвал зохистой. Ус ихтэй байх нь ялзмагших процест сөрөг нөлөөтэй. Айл болгоны хүнс, тэр бүү хэл тухайн үед саванд хийсэн зүйлс ч харилцан адилгүй байх тул заримдаа шингэн их гарна, заримдаа гарахгүй ч байж болно. 
   8. 14 хоногийн дараа нээхэд бордоо болоогүй, хийсэн зүйл хэвээрээ байна?🥦
   Бокаши сав нь бор шороо болгодог бордоошуулагч сав биш, хүнсний үлдэгдлийг ашигтай бактер үржүүлж (бран буюу үртэс нь ашигтай бактераар баяжуулсан) хөрсөнд ороод задрахад бэлэн болгож буй арга юм. Иймд 14 хоногийн дараа саванд анх хийсэн үлдэгдэл өнгө зүс нь бараг өөрчлөгдөөгүй хэвээрээ шахуу гарч ирэх ба нүдэнд харагдахгүйгээр ашигтай бактерууд үржиж, бордоо болоход бэлэн болсон байдаг. Үртсээ үлдэгдэлтэйгээ үелж хийхэнд гол ач холбогдол нь байдаг тул үртсээ хэрэглэхийг орхигдуулж болохгүй.

Хөрс бол ногоо жимс, үр тариа ургуулахын эхлэл юм. Амжилттай ургуулах нь хөрсний арчилгаагаас эхэлдэг. Үржил шимт хөрс гэдэг нь хими, биологи, физикийн хувьд үр тариа сайн ургуулах нөхцөлийг бүрэн хангасан хөрсийг хэлнэ.
- Химийн хувьд ургацын өсөлтөд шаардлагатай элементүүдийг зохих харьцаагаар агуулах ба хүнд металл, хорт бодис агуулаагүй байх 🧪
- Биологийн хувьд ургамлын ургалтад тустай ОЛОН ТӨРЛИЙН БИЧИЛ БИЕТЭН АГУУЛСАН, мөн мэрэгч амьтад, мөөгөнцөр болон төрөл бүрийн вирус агуулаагүй
хортон шавж, хортон шавжийн өндөг, авгалдай, хүүхэлдэйгүй, хогийн ургамлын үргүй байх 🧫
- Физикийн хувьд ус зайлуулах хангалттай агаарын нүх сүвтэй, агаар ороход хялбар, мөн үндэс ургахад саад болох чулуу, хог ургамлын үндэсгүй байхгүй байвал тохиромжтой💧
Ургац сайн ургахын тулд төрөл бүрийн элементүүд хэрэгтэй. Ургацад хэрэгцээтэй ерөнхий 15 элементүүд нь хүчилтөрөгч, устөрөгч, нүүрстөрөгч, азот, фосфор, кали, кальци, магни, хүхэр, зэс, төмөр, манган, цайр, бор, молибден юм. 
Хэчнээн үржил шимт хөрс байсан ч тасралтгүй газар тариалан эрхэлснээр хөрсний шим тэжээл алдагддаг. Үргэлжлүүлэн газар тариалан эрхлэхийн тулд ургацад шаардлагатай шим тэжээлийг хэрэгцээтэй хэмжээгээр нөхөн олгох хэрэгтэй.
✅ БОКАШИ БОРДОО ЯАГААД ДАВУУ ТАЛТАЙ ВЭ? 
Бокаши савнаас гарах 2 төрлийн хатуу, шингэн бордоо нь 100% органик бордоо юм. Органик бордооны үр нөлөө нь химийн бордооноос илүү удаан үргэлжлэх ба макро элементүүдээс гадна төрөл бүрийн микро элементүүдийг агуулдаг
тул нэг газар дараалан ургамал тариалах үед үүсэх хохирлыг багасгахад чухал ач
холбогдолтой.  Органик бордоо нь ус зайлуулалд сайтай ба тохиромжтой хэмжээгээр чийгийг хадгалдаг. Мөн бичил биетний үржилд тохиромжтой нөхцөлийг бүрдүүлдэг ба хөрсөнд нүх сүв үүсгэн үндэсний ургалтыг дэмждэг 💚
Гэхдээ органик бордоог буруу бэлтгэж бүрэн бус ялзарсан тохиолдолд хортон шавжийн үржилд таатай нөхцөл бүрдүүлэх аюултай. Хэрвээ хүнсний үлдэгдлээ шууд газарт булах эсвэл ил задгай хаявал ялзрал удаан явагдах ба бүрэн бус ялзарсан бордоо нь үндэсний ургалтыг саатуулах хий үүсгэдэг бөгөөд зарим тохиолдолд ургацыг үхэлд хүргэдэг. Иймд бокаши саванд 14-21 хоног битүү байлгаж исгэдэг нь ялзралтын явцыг түргэсгэж буй маш чухал ач холбогдолтой үе шат юм ♻️

Цаасан уут тийм ч байгальд ээлтэй сонголт байж чаддаггүй. Хамгийн зөв сонголт бол олон дахин ашиглах даавуун уут юм. 
Гялгар уутыг байгальд шингэдэггүй, хог хаягдал ихээр үүсгэж, байгаль орчны доройтолд нөлөөлж байгааг бүгд л мэддэг болсон. Энэ ч шалтгаанаар олон бизнесүүд гялгар уутны оронд цаасан уут ашиглаж эхэлсэн билээ. Цомхоны хүргэлт ч цаасан ууттай хэрэглэгчдийнхээ гарт хүрдэг 🚗
Цаасан уут нь илүү байгальд ээлтэй мэдрэмж төрүүлж, бага ч гэсэн хог хаягдлыг багасгаж буй сэтгэгдэл төрүүлэх боловч үнэхээр тийм байж чаддаг уу? 
🌱Давуу тал нь гэвэл цаасан уутыг дахин боловсруулж өөр бүтээгдэхүүн болгох, мөн хөрсөнд шингэж бордоошуулах боломжтой байдаг (гэхдээ зөвхөн зөв аргаар, хөрсөнд бүрэн булж хаясан тохиолдолд бордооших боломжтой, хогтой нийлүүлж хаясан цаас хөрсөнд шингэх бараг боломжгүй)♻️
Сул тал нь цаасан уутыг ихэнхдээ 1 удаа хэрэглээд л хаях ба олон дахин ашиглая ч гээд эдэлгээ даадаггүй, мөн зарим зүйлсийг савлах боломжгүй байдаг. Түүнчлэн нэг удаагийн цаасан аяга, хүргэлтийн хоол савладаг цаасан сав, ихэнх хүнсний сав баглаа боодол нь дотуураа гялгар уутан бүрхүүлтэй зөвхөн гадна давхарга нь л цаас байдаг учир байгальд бүрэн шингэх боломжгүй, гялгар уутнаас нэг их ялгаагүй зүйл юм. Харамсалтай нь тийм уут савыг эко, байгальд ээлтэй савлагаатай гэж рекламдаж хэрэглэгчдэд буруу ойлголт төрүүлж байдаг.

Бас нэг мэдүүштэй зүйл нь цаасан уутыг үйлдвэрлэхэд гялгар уут үйлдвэрлэхээс 4 дахин их энерги (эрчим хүч) зарцуулж байдаг. Харахад бүх талаараа байгальд ээлтэй мэт санагдаж болох ч аливаа бараа бүтээгдэхүүн бидний гарт хүрч ирэхээс өмнө хэр их байгалийн нөөц, эрчим хүч зарцуулж бий болсонг ойлгодог байх хэрэгтэй юм. Бараа бүтээгдэхүүн гэнэт л агаараас бий болчихдоггүй, үйлдвэрлэхийн тулд маш их нөөц зарцуулж, тээвэр түгээлтийн олон шат дамжиж бидний гарт хүрч байдаг. 
Тэгэхээр байгальд ээлтэй сонголт юу вэ? 💚
НЭГ ЗҮЙЛЭЭ ОЛОН ДАХИН АШИГЛАХ! Цаасан уутнаас өгсүүлээд бүх зүйлсийг аль болох олон дахин, ашиглалтын эцсийн боломж хүртэл нь хэрэглэх нь хамгийн зөв шийдэл. Дахин ашиглах бүртээ та байгальд ээлтэй алхам хийж байгаа гэсэн үг 😊
Даавуун уутыг хийхэд гялгар, цаасан уутыг хийхээс мөн л хэд дахин их энерги, нөөц зарцуулдаг. Эко сонголт гээд гэрээрээ дүүрэн хэрэглэдэггүй даавуун ууттай байх нь эргээд тийм ч зөв алхам биш болно. Зөвхөн өнгө үзэмж, гоё сайханд нь болж дахин дахин уут авах шаардлагагүй. Харин нэг уутаа тууштай, “тултал нь” олон дахин хэрэглээрэй! ♻️

Овъёосны сүү (oat milk) нь цэвэр ургамлын гаралтай, веган хүнс бөгөөд үнээний сүүг орлуулж байхуу цай, кофе, смүүти зэрэгт хийхээс гадна шууд ууж ч болно ☕️🥤 Хөл хорионы үед сүүний олдоц муу байвал овъёосны сүүгээр орлуулаад үзээрэй 🍶 (Жич: Уламжлалт сүүтэй цайнд болохгүй шүү 🙆‍♀️)
Овъёосны сүү хийхэд анхаарах зүйлс: 
1. Хэт удаан блэндэрт холивол овъёосны сүү зууралдамтгай бүтэцтэй болдог. Иймд 30-45сек холих нь тохиромжтой хугацаа юм. 
2. Зарим жорд овъёосоо урьдчилж дэвтээнэ гэсэн байдаг ч ингэвэл мөн л зууралдамтгай болдог тул шууд устай блэндэрдэх нь илүү дээр.
3. 2 удаа даавуунд шүүснээр илүүдэл цардуулыг багасгаж сүү илүү цэвэр, шингэн болдог.
4. Даавуугаар шүүх нь маарл, нүхтэй шүүлтүүрээр шүүснээс дээр байдаг. Нүх нь том байхаар овъёосны бүхэл хэсгүүд сүүнд ороод байдгийг анхаараарай.
5. Шүүж авсан сүүгээ хөргөгчинд 7 хоног хадгалж болно. Хадгалалтын явцад тунадас үүсэх нь хэвийн үзэгдэл ба хэрэглэхээсээ өмнө сэгсрээрэй.

Энгийн хүнсний содыг ахуйд олон янзаар ашиглаж болох бөгөөд хүний бие, байгальд сөрөг нөлөөгүй цэвэрлэгээний супер бүтээгдэхүүн шүү 💚♻️

Цэвэргээнд хэрэглэх аргууд:
1. Хана, шалан дээрх элдэв толбыг үрж арилгах.
2. Гал тогоо, угаалгын өрөөний бүх гадаргууг цэвэрлэх 🚽🛁
3. Хивс, орны матрасны үнэрийг дарах, ариутгах: Хүнсний содыг дээр нь жигд цацаж 30мин байлгаад тоос сорогчоор соруулж авна. Мөн гутлаа энэ аргаар цэвэрлэж ариутгаж болно 🛏
4. Жимс, хүнсний ногоог хэрэглэхээс өмнө содатай усаар угааж цэвэр усаар зайлж хэрэглэнэ 🍎
5. Сард 1-2 удаа хуйхаа гүн цэвэрлэх: Ердийн аргаар шампуниар үсээ угаахдаа 1 цайны халбага хүнсний сода нэмж хуйхаа сайтар массажилж угаана. Үсний будагтай бол анхааралтай байгаарай, зарим будагтай урвалд орж өнгө нь арилж болзошгүй шүү 🧖‍♀️
6. Хувцсан дээрх тосны толбо арилгах: Тосны толбыг хүнсний содаар бүрхэж цацаад хонуулна. Дараа нь ердийн аргаар угаана. Хүнсний сода нь тосыг өөртөө шингээж авсан байна 👚

Ээлжит зөвлөгөөгөөрөө хулсан сойзны талаарх мэдээллийг хүргэж байна. Хэрэглэгчид маань хулсан сойзыг хэр удаан хэрэглэх талаар нэлээдгүй асуудаг ба зарим нь хулсан сойзыг энгийн сойзноос удаан хугацаанд, бүр 1 жил хүртэл хэрэглэж болно гэх буруу ойлголттой байдаг нь анзаарагдсан билээ. Ингээд лавшруулж жоохон судалтал зарим дэлгүүр, борлуулагчид хулсан сойзыг өөрөө бактер устгах чадвартай учраас 1 жил хүртэл ч хэрэглэж болно гэх мэт буруу зөвлөгөө өгдөг юм байна. Энэ бол ХУДАЛ МЭДЭЭЛЭЛ. Ийм ямар ч баталгаатай эх сурвалж олдоогүй болно. Хулсан сойзыг энгийн сойзтой ижил хугацаанд буюу 3-4 САР ТУТАМД СОЛЬЖ ХЭРЭГЛЭХ нь зүйтэй. Шүдний эмч нар 2 сар тутамд солихыг ч зөвлөдөг. Түүнчлэн одоогоор зах зээлд байгаа ихэнх хулсан сойзны зөвхөн иш нь хулс буюу байгалийн гаралтай материал, харин үс нь пластик-нелон байсан хэвээр байна. 100% biodegradable буюу байгальд бүрэн шингэдэг гэсэн шошготой сойз ч пластик үстэй юм (үүнд манай дэлгүүрт зарагдаж байгаа сойзнууд ч орно). Маш цөөн брэнд л гахайн үстэй буюу байгальд бүрэн шингэдэг сойз үйлдвэрлэж байгаа ба энэ нь мэдээж хэд дахин үнэтэй байдаг. Энгийн сойзыг ч бид 1-2 сар хэрэглэсний дараа үс нь "арзайж дэлбээлээд" мууддаг шүү дээ. Тэгвэл хулсан сойз ч ижил асуудалтай болж таарна. Тэгэхээр 1 жил хэрэглэсэн сойз ямархуу хэцүү царайтай, "бактерийн үүр уурхай" болсон байхыг та ойлгосон байх.
Мөн хулсан сойзоо хэрэглэж дуусаад шууд хогондоо хийлээ гээд тэр нь хогийн цэгт очоод, тэндээ байгальд шингэдэг гэсэн үг биш юм. Хогийн цэг дээр янз бүрийн хог холилдсоноос болж байгальд шингэх боломжтой материал ч шингэж чадахгүй байсаар байдаг. Ялангуяа манайх шиг хогоо ангилж хаяж дадаагүй, тэгэх боломж нь ч хязгаарлагдмал газарт барагтай хог байгальд шингэлгүй бохирдол үүсгэж байгаа. Иймд хулсан сойзоо байгальд эргээд шингээж хаяя гэвэл үсийг нь бахиар салгаж аваад, хөрсөнд бүрэн булж үлдээх хэрэгтэй. Ингээд хулс нь 6 сар орчмын дараа өөрөө задарч байгальд шингэх боломжтой болдог ♻️
Гэхдээ хулсан сойз нь пластик сойзтой харьцуулахад хавь илүү ЭКО СОНГОЛТ мөн. Үсийг эс тооцвол эх бие нь тэр чигтээ хулс тул ядаж байгалийг бага бохирдуулна, бас авч явахад хөнгөн авсаархан байдаг.

Цомхон дэлгүүр хэрэглэгчиддээ үнэн зөв мэдээлэл хүргэж, эко хэрэглээг сурталчлахыг зорьдог тул энэхүү зөвлөгөөг тусгайлан бэлтгэлээ. Мөн амны хөндийн эрүүл мэнд хүн бүрт чухал, хүний эрүүл мэндтэй холбоотой асуудал учраас бусад дэлгүүр, борлуулагч нарыг хэрэглэгчиддээ үнэн зөв мэдээлэл хүргэж байхыг уриалж байна 😊

Хүн бүр дор бүрнээ чадах чинээгээрээ хог хаягдлаа бууруулж, эко амьдралын хэв маягийг хэрэгжүүлэхэд нийт олноороо том амжилтанд хүрэх боломжтой билээ. Хогоо багасгах, аливаа нэг удаагийн хэрэглээнээс татгалзах нь хүнээс өөрөөс нь заавал их, бага хэмжээний хичээл зүтгэл шаарддаг, байнга хэрэгжүүлэхийн тулд дадал зуршил өөртөө суулгах хэрэгтэй байдаг. Адаглаад дэлгүүр гарахдаа даавуун уутаа марталгүй авч байх хэрэгтэй болно, харьцуулахад дэлгүүрээс гялгар уутанд тэнд нь савлуулаад авах илүү хялбар учир тэр үйлдэлд бүр дасчихсан байдаг шүү дээ. Иймд багахан хөдөлмөр, цаг зав илүү гаргахаас залхуурч, халширч эсвэл заримдаа учраа олохгүй явсаар хог хаягдлаа багасгаж чадахгүй байх нь бий. Цомхоноос нэгтгэж бэлтгэсэн 18R зарчмыг хадгалж аваад, REMEMBER -  өөртөө болон бусдад сануулж, хэрэгжүүлэхийг хичээж байгаарай 😊
Бүх зүйл эх дэлхийгээ, бусдыг болон өөрийгөө, бас эд зүйлээ ч RESPECT - хайрлан хүндлэхээс эхэлнэ. Амьд бүхнийг энэрэн хайрлаж, амьдрах орчинг нь сүйтгэхгүй, бохирдуулахгүй байлгаж, амьгүй эд зүйлээ ч ариг гамтай, хүндэтгэн хэрэглэх хэрэгтэй юм. Ингээд жижиг том олон дадал зуршлыг өдөр тутмын амьдралдаа хэрэгжүүлж эхэлнэ. Үр дүн нь сэтгэлд хүрэхгүй байсан ч, эсвэл мартсан байсан ч RETRY - шантралгүйгээр дахин оролдож эко, хог хаягдалгүй хэрэглэгч болохыг зориорой. ТА ҮҮНИЙГ ЧАДНА 🤩👍

🟢Greenwashing: Бараа бүтээгдэхүүн, өөрийн үйл ажиллагааг байгаль орчин, хүн амьтанд ээлтэй мэт худал сурталчлах арга заль~

Сүүлийн үед зураг дээрхтэй төстэй "хулсан" гэгдэх хүүхдийн хоолны хэрэгсэл ихэд тархсан билээ. Харамсалтай нь ийм аяга таваг рекламдаж байгаа шигээ эрүүл, аюулгүй сонголт огт биш юм. Хулсыг бүр буталж нунтаг болгоод буцаж хэлбэрт оруулан биежүүлэхийн тулд өөр олон бодис тэр дундаа меламин гэх хүний биед хортой, хавдар үүсгэгч бодис хольж аяга тавагны хэлбэрт оруулдаг. (хэдэн жилийн өмнө Хятадад меламинд хордож нярай хүүхдүүд олноороо эндсэн тухай ОУ-н мэдээгээр нэг хэсэгтээ шуугисан) Ингэж үйлдвэрлэсэн бүтээгдэхүүн нь хулсны бүх шинж чанараа алдах төдийгүй ер нь бусад хуванцар эдлэлээс ямар ч ялгаагүй болдог. Байгальд буюу хөрсөнд эргээд шингэхгүй. Энэ бол цэвэр greenwashing!⚠️
Итгэхгүй бол та ёроолыг нь эргүүлж хараарай: MELAMIN WARE гэсэн бичиг байгаа. Меламинтай аяга тавганд ялангуяа халуун зүйл огт хийж болохгүй, хорт бодис нь хоолонд бага багаар шингэж хүний биед орж байдаг. Судалгаагаар брэнд, үйлдвэрлэгчээсээ хамаараад ялгаруулах хорт бодисын хэмжээ өөр байсан ба халуун зүйл, хүчиллэг зүйл хийхэд илүү ихээр ялгарч байсан байна. Зөвхөн хүүхдийн аяга таваг гэлтгүй "дахин ашиглах" гэгддэг кофены аяга ийм материалтай хийсэн нь бас түгээмэл байдаг. Цай кофег халуунаар нь савлуулж авдаг тул аяганаас тань хорт бодис ялгарч таны биед орж байж болзошгүй тул анхаарагтун! Магадгүй халуун биш зүйлд хэрэглэж болох ч дээрх сөрөг нөлөөг нь санаж байвал зохилтой🌡☕️
🌿Түүнчлэн байгалийн модон, хулсан аяга тавгийг ч зөвлөхөд хэцүү байдаг. Учир нь байгалийн материал л бол бактер, хөгц үржих таатай нөхцөл болно. Олон дахин угааж хатаасны дараа хэт хуурайшсанаас бол хэлбэрээ алдан гажиж, хагарч хугардаг. Модон эдлэлийг арчилж тослох тусгай аргууд уг нь байдаг ч тэр бүр хүмүүс мэддэггүй. Түүнчлэн худалдаанд байгаа модон аягануудад шингэнийг нэвчихээс сэргийлж тусгай лакаар бүрдэг нь хуванцар хэрэглэж байгаатай огт ялгаагүй. Харахад модон аяга, үнэндээ хуванцар сав (эх сурвалж: Хүнсний инженер пэйж) Гэхдээ цаана нь төмөр, шилэн, шаазан, силикон гээд өөр олон аюулгүй сонголт бий шүү дээ 🍽
Манай дэлгүүрээс хайж сураглах нь бий тул бид үнэн зөв мэдээлэл хүргэхийг хүслээ. Манайд ийм бүтээгдэхүүн хэзээ ч зарагдахгүй, бид хэрэглэгчдийн эрүүл мэндэд сөрөг нөлөөтэй зүйл борлуулахгүй!❌
Энэ талаар судалгаанд суурилж баталсан эх сурвалжууд: 
1. https://www.chemistryworld.com/.../reusab.../4010950.article
2. https://www.iamexpat.de/.../stay-away-bamboo-coffee-cups...
3. https://www.facebook.com/groups/723811091813664/posts/1297794394415328/

Манайхаас Aneer сарын тэмдгийн тэмдэг авсан (бас авахаар төлөвлөж байгаа кк) эмэгтэйчүүддээ нэг бяцхан зөвлөгөө өгье 💁‍♀️ Aneer аяганы ёроолын иш нь бусад аяганаас урт байдаг онцлогтой. Аягаа султгахдаа ишнээс нь зөөлөн татаж гаргадаг тул ийм иш заавал байдаг. Харин иш нь хэрэглэхэд тухгүй хэт урт байвал хайчлаад богиносгож болдог давуу талтай юм. Аяга өөрөө зөөлөн силикон материалтай тул зүгээр л хайчаар хайчлаад богиносгох боломжтой ✂️

Ишийг нь яаран тайралгүй аягаа эхлээд хэрэглэж үзээд дараа нь хэр тайрч богиносговол зохимжтой байхыг шийдэхийг санал болгож байна. Учир нь зарим хүнд уртаараа хэрэглэхэд хялбар байдаг бол заримд нь богино нь дээр байж болно. Ишин дээрээ 3 зураас байх ба зураасны дагуу хэмжээг нь тааруулаад тайрахад болно.
Өөр бусад брэндийн сарын тэмдгийн аяганд ч ишийг нь тайрч тааруулах боломжтой шүү 😊
Олон эмэгтэй сарын тэмдгийн аяганы тухай сонссон ч хэрэглэхэд айдас, эргэлзээтэй байдаг нь анзаарагдсан билээ. Угтаа эмэгтэй хүний бие физиологид тохируулан, эрүүл мэндэд хоргүй, нугалардаг зөөлөн силикон материалаар хийгдсэн тул хэрэглэхэд ямар нэг эрсдэлтэй зүйл байхгүй, аль хэдийн олон зуун эмэгтэй байнгын хэрэглээгээ болгосон байгальд ээлтэй сонголт бөгөөд зөвхөн хараахан мэдэж, хэрэглэж үзээгүй учраас л сэтгэлзүйн бяцхан айдас байдаг. Харин хэрэглээд үзсэний дараа маш хялбар, биед тухтай байгааг нь та гайхах болно 🤯
Эмэгтэй хүн амьдралынхаа туршид дунджаар 11,000 ширхэг ариун цэврийн хэрэглэл, тампон хэрэглэдэг гэсэн тооцоо байдаг. Мөн нэг ширхэг ариун цэврийн хэрэглэлд 3 ширхэг гялгар ууттай тэнцэх хэмжээний хуванцар ордог байна. Ариун цэврийн хэрэглэл нь байгальд шингэдэггүй, эсвэл шингэж задрах хүртлээ маш олон жил байгалийг бохирдуулж, хорт бодис ялгаруулж байдаг. Иймд сарын тэмдгийн аяга бол эко хэрэглээ юм. Бүсгүй та сарын тэмдгийн аяга хэрэглэснээр хог хаягдлаа багасгаж, байгаль дэлхийгээ бохирдуулахгүй байх боломжтой болно.

1. Үтрээний үрэвсэлтэй, үрэвслийн эмчилгээ хийлгэж байгаа, мөн эмчилгээ дуусаад бүрэн эдгэрч дуусаагүй байгаа үед сарын тэмдгийн аяга хэрэглэж болохгүй. Иймд эмэгтэй танд эрүүл мэндийн тулгамдсан асуудал байгаа бол эхлээд сайтар эмчлүүлж, эмчийн зөвлөгөө аван бүрэн эдгэрч, үтрээний орчин хэвийн болсны дараа сарын тэмдгийн аяга хэрэглэж эхлээрэй. Анх удаа хэрэглэхээс өмнө эмчид үзүүлж зөвлөгөө авахад ч илүүдэхгүй. Урьдчилан сэргийлэх зорилгоор 6 сар тутамд эмэгтэйчүүдийн эмчид үзүүлж байхыг нь ер нь зөвлөдөг шүү дээ 👩‍⚕️
2. Төрсний дараах шавхарганд сарын тэмдгийн аяга хэрэглэхийг бүрэн хориглоно. Учир нь төрөлтийн явцад үтрээнд гэмтэл үүссэн байж болзошгүй, хэвийн орчин нь алдагдаж эмзэг болсон байдаг тул ямар ч тохиолдолд хэрэглэхгүй байхыг зөвлөж байна. Иймд төрсний дараа бие бүрэн тэнхэрч, үтрээний орчин эргэж хэвийн байдалдаа орсны дараа сарын тэмдгийн аяга хэрэглээрэй ❤️
3. Сарын тэмдгийн аягыг тогтмол султгах, цэвэрлэх, гараа ариутгах боломжгүй нөхцөл байдалд байвал хэрэглэхгүй байсан нь таны эрүүл мэнд, аюулгүй байдалд илүү зөв сонголт болно. Учир нь сарын тэмдгийн аягыг багадаа 4 цаг тутамд гаргаж султган, цэвэрлээд буцааж хийх хэрэгтэй байдаг тул тохь тухтай ариун цэврийн өрөө, аяга болон гараа цэвэрлэх цэвэр ус байхгүй нөхцөлд хэрэглэхэд хүндрэлтэй болно. Аялалд явах, гадуур ажилтай, ажил мэргэжлийн онцлогоос шалтгаалж урт хугацаанд ариун цэврийн өрөө орох боломжгүй байдаг гм шалтгааны улмаас хэрэглэх боломжгүй байж болно. Гэхдээ та гэртээ байхдаа сарын тэмдгийн аяга хэрэглэж заншвал нэг удаагийн хэрэглэлийн хог хаягдлаа талыг нь ч болсон багасгах боломжтой шүү ♻

Сарын тэмдгийн аяга гэдэг нь эмэгтэйчүүдийн сарын тэмдгийн шингэнийг цуглуулж авдаг силикон аяга юм. Уг аягыг сарын тэмдэг эхлэхээс дуусах хүртэл хэрэглэх ба зааврын дагуу нугалж үтрээнд хийхэд дэлгэгдэж тогтон шингэнийг дотроо цуглуулдаг. 2 цаг тутамд гаргаж угааж цэвэрлээд буцааж хийнэ, зайлшгүй үед 12 цаг хүртэл шингэнийг асгалгүй барих чадвартай байдаг. Уламжлалт ариун цэврийн хэрэгслүүд нь шингэнийг өөртөө шингээж авдаг бол сарын тэмдгийн аяга нь шингэнийг дотроо цуглуулдаг учир биед таагүй мэдрэмж төрүүлэхгүй, хөдөлгөөнд саад учруулахгүй мөн үнэр гарахгүй зэрэг олон давуу талтай. Материалын хувьд бүгд эмнэлгийн зориулалттай силикон байдаг (medical grade silicon).

Хэлбэр нь үйлдвэрлэгч болон брэндээс хамаарч өөр байдаг ч хоорондоо ерөнхийдөө төстэй, хонх хэлбэртэй мөн ёроолдоо аягыг гаргаж авах, үтрээнд хийхэд зориулсан жижиг бариултай байна. Нэг аягыг 5-10 жил хүртэл хэрэглэх боломжтой. Ихэнх аяганууд S, L гэсэн 2 хэмжээтэй байх ба S нь хүүхэд төрүүлээгүй, залуу эмэгтэйчүүдэд, L нь хүүхэд төрүүлсэн мөн 25-аас дээш насны эмэгтэйчүүдэд тохирно гэсэн заалттай байдаг байна. Хүн болгоны биеийн онцлог өөр тул та өөрийнхөө мэдрэмжээр хэмжээгээ тааруулах боломжтой.

Давуу талууд:

• Олон дахин ашиглах тул хог хаягдлын хэмжээг багасгадаг.

• Ариун цэврийн хэрэглэл, тампон дэх элдэв химийн бодис нь биед хортой нөлөө үзүүлж, ховор тохиолдолд үхэлд хүргэх нь ч бий (Toxic shock syndrome). Мөн тампон их хэрэглэх нь үтрээний дотоод чийгшлийг багасгаж хуурайшуулдаг. Харин сарын тэмдгийн аяга нь биед гаж нөлөөгүй, өвтгөхгүй, тав тухтай байдлыг бий болгодог. Сарын тэмдгийн аяга хэрэглэдэг бүсгүйчүүд дахиж ариун цэврийн хэрэглэл огт хэрэглэхээ больдог. Та хэрэглэж үзээд биед юу ч мэдрэгдэхгүй, чөлөөтэй сайхан байхад гайхах болно!

• Сарын тэмдэг ихээр ирж буй үед ч шингэнийг удаан барих чадвартай учир ажил хийх, гадуур явах, спортоор хичээллэх, шөнө унтах зэрэгт саадгүй. Аяганы хэмжээ нь тийм ч бага биш. Мэдээж шингэн ихээр гарч буй өдрүүдэд аль болох ойр ойрхон султгаж хэрэглэх нь эрсдэлгүй

• Нэг аягыг удаан хэрэглэх учир эдийн засгийн хувьд маш хэмнэлттэй. Танд ердөө л аяга байхад хангалттай тул цаашид ариун цэврийн хэрэглэл, тампон авах шаардлагагүй болно. Бүсгүй та нэг сар, нэг жилд зөвхөн ариун цэврийн хэрэглэлд хэдэн төгрөг зарцуулж байгаагаа тооцож байсан уу? Сарын тэмдгийн чанартай нэг аяга авах мөнгөнөөс лавтай илүү гарна шүү.

Бран нь ашигтай бичил биетээр (бактери) баяжуулсан, тусгай үртэс юм. Бактериуд нь өлсгөлөн, эрч хүчээр дүүрэн бөгөөд бокаши саванд хоолны үлдэгдэл дээр оронгуутаа л ажлаа хийж эхэлдэг🦠 Орчин нөхцөл нь зөв таарсан байхад дорхноо л үржиж өсөн нэмэгдэнэ. Битүү буюу хүчилтөрөгчгүй орчинд хамгийн сайн үрждэг тул зориулалтын бокаши саванд ашиглах, саваа битүү байлгах нь хамгийн үр дүнтэй юм.

Ок баахан бичил биет үрждэг юм байна, тэгээд бордоо болгоход ямар хэрэгтэй юм гэж үү? Хоолны үлдэгдэл нь тэр чигтээ уургийн хэлхээсүүд байдаг. Уураг хэлбэрээр байхад хөрсөнд ямар ч тэжээл болохгүй. Бран доторх өнөөх олон бактериуд маань уургийг нь идэж задлан илүү жижиг хэсэг - амин хүчлүүд болгодог. Ургамал, ногоо нь тэдгээр амин хүчлүүдээс тэжээл авч ургана🌱 Хөрсөнд байдаг бактериуд азот, фосфор, кали болон бусад минералуудыг задалж ургамалд хэрэгтэй хоолыг нь бэлдэж өгдөг гэж ойлгож болно. Хариуд нь ургамлын үндсэн дэх амин хүчлүүд, сахараар бактериуд бас хооллодог гэнэ. Тэгэхээр энэ бол байгалийн үнэхээр гайхалтай зохилдлогоо бас ашигтай хамтын ажиллагаа байгаа биз? 💞

Хэрэглэгчид маань браныг энгийн үртсээр орлуулж болох уу гэж асуух нь бий. Чийгийг шингээх, үнэр дарах зорилгоор хоолны үлдэгдэл тэр бүү хэл хуурай жорлонгийн ялгадас дээр ч үртэс цацаж хэрэглэж болно. Гэхдээ ашигтай бактери байхгүй учраас дээр бичсэнчлэн хөрсөнд ороод задрах, ургамал тэжээл болох талаасаа нөлөөгүй юм. Тэгэхээр бокаши савандаа зориулалтын браныг нь авч хэрэглэж байгаарай. Бранаа хэмнэж, бага хэрэглэе гэвэл саваа аль болох бага онгойлгох, битүүмжлэлийг нь сайн байлгахад анхаараарай. Тэгвэл бактериуд нь өөрсдөө таатай орчиндоо өсөх боломжтой болно ☺

Үртсээ аль болох хангалттай хэмжээгээр хийж байх хэрэгтэй. Хэмнэлттэй хэрэглэх бол бага хийгээд саваа олон дахин онгойлгохгүй битүү байлгах нь бичил биетүүд илүү хурдан үржиж олшроход тустай.

Бокашиг шууд нарны тусгалд тавихгүй, гэхдээ дулаан газар байлгах хэрэгтэй. Зун үүдний пин, балкон зэрэгт тавьж болно, өвлийн улиралд тасалгааны хэмд байлгана. Гал тогоонд байвал ашиглахад хялбар байдаг.

Бокаши саванд 14-21 хоног тутамд бэлэн болсон бордоог хөрстэй хольж ашиглана. Орон сууцны айлууд өвөл балкон дээрээ илүүг нь хөлдөөгөөд хэрэгтэй үедээ тасалж гэсгээгээд ашиглаж болно (айл болгоны хэрэглээ өөр байж болно) Хашаа, зуслангийн газарт бол хэрэглэхэд хамгийн хялбар: 14-21 хоног исгэсэн ялзмагийг газарт нүх ухаад шууд булж хөрсөө бордоошуулна (бокашиг тогтмол хэрэглэх айл нэг мөр 30см орчим өргөнтэй жижиг суваг ухаад тэндээ ээлж ээлжээр ялзмаг хийж булаад явбал хялбар)

Орон сууцны айлууд шууд хөрсөнд булах боломжгүй учраас хамгийн хялбар арга нь цэцэг, ургамлын хөрсөнд ашиглах юм. Бокашинаас гарсан ялзмаг бордоог цэцгийн хөрсөнд ашиглахдаа:

1-р арга: Иссэн бордоог бокашинаас султгаад 50/50 харьцаагаар хөрстэй холиод энгийн сав, хувинд хийж дахин 14 хоног байлгаж бүрэн задалж, бор шороо болгоно. Энэ хугацаанд ялзмаг бараг бүрэн задарч дууссан байх ба цэцгийн саванд хийгээд шууд хэрэглэнэ. Энэ аргаар бордоотой хөрс гаргаж авахад нийт хугацаа нь сар орчим болно

2-р арга: Иссэн бордоог шууд ашиглах бол цэцгийн савны ёроолд багахан хөрс зулж хийгээд савны 1/3-д ялзмаг хийж дээрээс нь хөрсөөр дүүргэнэ. Өөрөөр хэлбэл, савны зөвхөн ёроол хэсэгт багахан ялзмаг хийж дээшээ хөрсөөр дүүргэнэ. Ялзмаг, хөрсний харьцаа ихдээ 40/60 орчим байх ба хэт их ялзмаг хийвэл хөрсөнд задрахдаа дулаан ихээр ялгаруулдаг тул ургамлын үндэс, үрсэлгээг түлж үхүүлж болзошгүйг анхаарна уу. Энэ арга нь нэмэлт хугацаа шаардахгүй, бордоогоо бокаши савнаас гаргаад шууд хэрэглэж болдог давуу талтай юм.

Гэрийн нөхцөлд ногоо, жимсний үлдэгдэл буюу органик хаягдлыг исгэн ялзмагжуулж бордоо болгодог сав

Бокаши савыг хэрхэн ашиглах вэ: Гал тогооноос гарах органик хаягдал (жижиглэсэн ногоо, жимс, хүнсний үлдэгдэл)-ыг уг саванд цуглуулна. Хүнсний үлдэглийг 1 удаад 1литрээс ихгүй хэмжээтэй хийх ба нэмж хийх бүртээ бокаши бран буюу ашигтай бичил биет агуулсан үртсийг дээрээс нь нимгэн цацаж өгнө. Дараа нь цугларсан үлдэгдлийг доош шахаж дараад савны тагийг тавьж түгжээд орхино. Сав бүрэн дүүрмэгц тагийг онгойлголгүйгээр тасалгааны хэмд 2 долоо хоног байлгана. Исч, хагас бордоошсон хүнсний үлдэгдлийг султгаад энгийн шороотой хольж бордоотой хөрс гаргаж авна. Хашаа, зуслангийн айлууд хашаандаа жижиг суваг ухаад түүндээ бокашигаас гарах бордоог ээлж ээлжээр хийгээд хөрсөө бордож болно. Гэртээ хүнсний ногоо, цэцэг ургамал тарьдаг бол исгэсэн үлдэгдлээ хураан, бага зэргийн хөрстэй хольж бордоошуулан хэрэглэхэд цэцэг ногоонд гайхалтай сайн тэжээл, органик бордоо болно. (Бокашинаас гарах бүтээгдэхүүн нь бүрэн боловсорч задарсан бор шороо бус ялзмаг бордоо тул заавал хөрстэй холих эсвэл хөрсөнд хийж хэрэглэнэ - ДАНГААРАА ХӨРСИЙГ ОРЛОХГҮЙ)

♻️Бокаши бордоошуулагч саванд хийж болох хүнсний үлдэгдэл:

-Хүнсний ногоо, жимс, ургамлын үлдэгдэл

-Хоолны үлдэгдэл (шөл, усгүй байх), агшаасан будаа, талх гм

-Кофены шаар, өндөгний хальс

-Мах, загасны үлдэгдлийг маш бага хэмжээгээр хийнэ.

❌Бокашинд хийхийг хориглох зүйлс:

-Хүнсний бус буюу байгалийн гаралтай бус аливаа хог хаягдал

-Махны үлдэгдэл хэт ихээр хийх

-Үнс

-Бог, бод малын яс, арьс (тахиа, загасны зөөлөн яс хийж болно)

-Шингэн зүйлс

Бүтээгдэхүүний иж бүрдэлд дараах зүйлс багтана:

• Бокаши сав - цорго, дотор тагны хамт
• Бокаши бран буюу үртэс 500гр
• Ашиглах заавар - монгол хэл дээр
• Зөвхөн 21л том бокаши саванд сэрээ дагалдана

10л сав нь орон сууцанд эсвэл бордоог бага багаар гаргаж авах айлд хялбар байдаг бол 21л том бокаши нь өрхийн хэрэгцээний жижиг талбайд ногоо тарьдаг, хүлэмжтэй, цэцэг ургамал байнга тарьдаг, мөн бокаши савыг тогтмол хэрэглэж сурсан хүмүүст илүү тохиромжтой байдаг. Ердийн 10л бокашинаас 2 дахин их багтаамжтай, дүүрэх хугацаа нь урт гэхдээ исгэх хугацаа нь ижил 14-21 хоног байна. Бокаши 10л савыг 2-3 ээлжилж хэрэглэхэд зохимжтой байдаг бол 21л сав 2 байхад хангалттай. Мөн 10л, 21л савыг ч ээлжилж хэрэглэж болно.

Түгээмэл асуултууд:

- Бокаши сав хэр хурдан дүүрэх вэ?

Хэрэглээнээс хамаарна. Өрхийн гаргаж байгаа хүнсний үлдэгдэл, тэр дундаа бокашинд хийх боломжтой ургамал ногоо жимсний үлдэгдэл хэр их байхаас хамаарч 7-20 хоногт дүүрч болно.

- Бокашиг гэрт тавихад үнэр гарах уу? Битүүмжлэл хэр вэ?

Бокаши сав нь 2 давхар тагтай, цорго нь нээж хаах хавхлагатай бүрэн битүүмжлэлтэй сав байдаг. Хаалттай байхад үнэр огт гарахгүй. Нээх үед үнэр гарах ба хэр удаан исч байгаагаас хамаарч үнэр нь сул, хүчтэй байна. Иймд бокашигаа нээж хүнсний үлдэгдэл нэмэхдээ орон сууцанд бол цонх, балконоо түр нээх, байшинд бол үүдэндээ түр гаргах зэргээр агааржуулалт сайтай орчинд хийхийг зөвлөж байна.

- Бокаши дүүрээд 14 хоног хүлээх хооронд хоолны үлдэгдлээ яах вэ?

Бокаши савыг хосоор нь хэрэглэхийг зөвлөдөг. Нэг саваа дүүргээд 14 хоног исгэх хооронд нөгөө саваа ашиглана. Зөвхөн нэг сав ашиглаж байгаа бол хүлээх хугацаандаа хүнсний үлдэгдлээ ердийнхөөр хаяна эсвэл цуглуулаад хадгалж болно, үүнийг ХЭРЭГЛЭГЧ ӨӨРӨӨ ШИЙДНЭ.

- Бокашигаас гарсан үлдэгдлийг яах вэ?

Иссэн үлэгдлээ хөрс шороотой хольж бордоо болгоно. Орон сууцны айлууд гэртээ цэцгийн хөрсөнд хэрэглэж болно, гадаа модны нүхэнд булж болно. Хашаа зусланд газарт шууд булж болно. Бордоо хэрэгтэй хүнд өгч болно. ХЭРХЭН ХЭРЭГЛЭХЭЭ ХЭРЭГЛЭГЧ ӨӨРӨӨ УРЬДЧИЛЖ БОДОЖ, ТӨЛӨВЛӨСӨН БАЙХ ХЭРЭГТЭЙ.

- Бокаши бран буюу зориулалтын үртсийг хэр удаан хэрэглэх вэ?

Хэрэглээнээс хамаарна. Бокаши саваа идэвхтэй хэрэглэдэг айлд 500гр браныг 5-10 удаад нэг сав дүүргэхэд хэрэглэж дуусна. Задрахад хэцүү үлдэгдэл: мах, кофены шаар гм хийсэн бол бран нэмж хийх шаардлагатай.

- Бокашинаас гарсан шингэн бордоог яах вэ?

Савны ёроолд байх цоргыг 2-3 хоног тутамд нээж шингэнийг юүлж авна. Уг шингэн бордоог 1:100 харьцаагаар усаар шингэлээд шууд цэцэг, зүлгээ усалж болно. Хэрэглэхгүй бол шууд асгаж болно (угаалтуур, бохирын системд сөрөг нөлөө байхгүй органик шингэн байдаг)

- Бокашинаас шингэн бараг гарахгүй байна?

Заавал шингэн ихээр гарах албагүй. Хийсэн үлдэгдлийн шинж чанараас хамаарч шингэн гарахгүй байж болно, эсвэл их хэмжээгээр ч гарч болно. Аль болох шингэн ихтэй зүйл хийхгүй байвал зохистой. Ус ихтэй байх нь ялзмагших процест сөрөг нөлөөтэй.

- 14 хоногийн дараа нээхэд бордоо болоогүй, хийсэн зүйл хэвээрээ байна?

Бокаши сав нь бор шороо болгодог бордоошуулагч сав биш, хүнсний үлдэгдлийг ашигтай бактер үржүүлж (бран буюу үртэс нь ашигтай бактераар баяжуулсан) хөрсөнд ороод задрахад бэлэн болгож буй арга юм. Иймд 14 хоногийн дараа саванд анх хийсэн үлдэгдэл өнгө зүс нь бараг өөрчлөгдөөгүй хэвээрээ шахуу гарч ирэх ба нүдэнд харагдахгүйгээр ашигтай бактерууд үржиж, бордоо болоход бэлэн болсон байдаг. Үртсээ үлдэгдэлтэйгээ үелж хийхэнд гол ач холбогдол нь байдаг.