Өөрийн гараар эрүүл, амттай хиам зайдас хийх боломжтой боллоо!
Иж бүрдэлд: гахайн өлөн, зориулалтын шахагч (олон дахин ашиглана), даавуун утас
Гэрийн зайдас хийх арга
Зөвлөгөө: Өөрийн хүссэн махаар, мөн мах хольж хийж болно. Нийт махны жингийн 20% нь өөх байвал хамгийн тохиромжтой байдаг. Хамгийн ихдээ 50% өөх хийнэ. Сайн барьцалдуулахын тулд желатин нэмж хийж болно. Ерөнхийдөө махан орцны жингийн 2%-иар тооцож давс, амтлагч хийнэ.
1. Өлөнгөө бүлээн усанд 30мин дэвтээж зөөлрүүлнэ. Өлөн дотроо ус хийж зайлна.
2. Махаа бага зэрэг гэсгээж машиндахад бэлэн болгож жижиглэнэ.
3. Жижиглэсэн махан дээрээ давс, амтлагчаа хийж хутгаад машиндаж болно. Эсвэл машиндаж дуусаад нэмсэн ч болно.
4. Машиндсан махаа сайтар хутгаж холино. Нухаш шиг болох ёстой. Аргуу байвал аяга ус, цагаан дарс нэмж болно. Амтыг нь шалгахын тулд багахан хэсгийг хуурч болгоод амсаж үзээрэй.
5. Өлөнгөө шахагчны хошуунд бүгдийг нь углаад бэлэн болгоно. Хошууг нь бага зэрэг тосолвол хялбар байдаг.
6. Өлөнгийн эхлэлд нь 10см орчим зай үлдээж махаа шахагчаар шахаж эхэлнэ. Зайдас шахах үед 2 хүн хийвэл илүү хурдан байдаг шүү. Нэг нь махаа шахна, нөгөө нь зайдсаа тосч барина.
7. Өлөнгөө таслалгүй уртаар нь бүх махаа дуустал нь шахна. Цоорхой байвал бултайж гарсан махыг нь шахаж оруулаад тасралтгүй шахаад байна. Хэтэрхий их чихэж болохгүй. Жигд шахаж чадахгүй байвал дуусгаад жигдэлж болно шүү.
8. Шахаж дуусаад зайдсаа өөрийн хүссэн хэмжээгээр хувааж эргүүлнэ. Үргэлжилсэн урт чигээр нь ч байлгаж болно.
9. Хийтэй хэсгүүд бомбойсон байвал чигчлүүрээр зөөлөн хатгаад хийг нь гаргаарай.
10. Хувааж дууссан зайдсаа эхлэл төгсгөлийг нь зангидаж тавина.
11. Зайдсаа хөргөгчинд дор хаяж 4 цаг, болвол хонуулж сэврээнэ. Ингэснээр бүрхүүл нь хатуурч амархан хагарахгүй болж хэлбэр нь тогтоно. Сэврээх явцдаа 1 удаа эргүүлж тавиарай.
12. Ингээд зайдас бэлэн боллоо. Та өөрийн гараар хийсэн эрүүл, амттай зайдсаа хүссэн аргаараа боловсруулж амтарсан зооглоорой! Зайдсаа хөлдөөж хадгалж болно.
Зайдасны хялбар жор:
- 3 кг машиндсан мах (20% өөх)
- 1 аяга ус эсвэл цагаан дарс
- 3 том халбага ганга, розмари (thyme, rosemary)
- 1 том халбага нунтаг кориандер (coriander)
- 1 том халбага нунтаг гоньд
- Бага зэрэг халуун амттай болгох бол 1 том халбага халуун чинжүүний нунтаг
- 20гр давс
- 1 том халбага нунтаг хар перец
- Сонгино, саримс мөн нэмж болно
Тахианы махан зайдасны жор:
- 2.5кг тахианы ясгүй мах (хальстай нь хамт хийнэ, хальсан дахь өөх нь зайдасны амтыг сайхан болгоно)
- 2 том халбага давс - 2 жижиг халбага нунтаг хар перец - 2 жижиг халбага ганга (thyme, тимьян) - 1 жижиг халбага нунтаг цагаан гаа - 1 жижиг халбага нунтаг халуун чинжүү, эсвэл халуун чинжүүнд дургүй бол паприка буюу амтат чинжүүний нунтаг - 1 аяга тахианы шөл (шулсан яснаасаа гаргаж болно) - Сонгино, саримс, бусад дуртай амтлагчаа өөрийн амталгаагаар нэмж болно Хийх арга: Эхлээд тахианы махаа машиндаж бэлдэнэ. Бүх амтлагч орцуудаа тахианы шөлөндөө хийж сайтар хутгана. Машиндсан махан дээрээ шөлөө хийгээд гараар хутгана. Махны машины хамгийн нарийн шүүрээр нь дахиж машиндана. Өлөндөө бэлэн болсон махаа шахаж хийнэ. Бусад ерөнхий зүйлс нь дээрх заавартай адил тул дагаад хийгээрэй
